داغ دہلوی

آرزو ہے وفا کرے کوئی
جی نہ چاہے تو کیا کرے کوئی

گر مرض ہو دوا کرے کوئی
مرنے والے کا کیا کرے کوئی

کوستے ہیں جلے ہوئے کیا کیا
اپنے حق میں دُعا کرے کوئی

اُن سے سب اپنی اپنی کہتے ہیں
میرا مطلب ادا کرے کوئی

تم سراپا ہو صورتِ تصویر
تم سے پھر بات کیا کرے کوئی

جس میں لاکھوں برس کی حوریں ہوں
ایسی جنت کو کیا کرے کوئی

۔۔۔۔۔۔۔۔۔۔۔۔۔۔۔۔۔۔
داغ دہلوی




کیوں نہ جہاں میں ہو عیاں ۔۔۔۔۔ عیب و ہنر الگ الگ
دیکھتے ہیں بچشمِ غور ۔۔۔۔۔۔ اہل نظر الگ الگ

اُس کی تلاش میں مگر ۔۔۔۔۔۔ ایک کا ایک ہے رقیب
پھرتے ہیں روز و شب جو یوں ۔۔۔۔۔۔ شمس و قمر الگ الگ

راہ میں اُن کو وہم تھا ۔۔۔۔۔۔ کوئی نہ بدگماں ہو
آئے تو ساتھ وہ مجھ سے مگر الگ الگ

تیغ نگاہ یار کو ۔۔۔۔۔۔ دیتے ہیں ہر گھڑی دُعا
پارۂ دل جدا جدا ۔۔۔۔۔۔ لختِ جگر الگ الگ

روح فزا کسی کو ہے ۔۔۔۔۔۔ روح گزا کسی کو ہے
بادۂ عشق نے کیا ۔۔۔۔۔۔ اپنا اثر الگ الگ

کس کا یقیں کیجیے ۔۔۔۔۔۔ کس کا یقیں نہ کیجیے
لائے ہیں اُس کی بزم سے ۔۔۔۔۔۔۔ یار خبر الگ الگ

میں ہوں اِدھر تو وہ اُدھر ۔۔۔۔۔۔ میں ہوں یہاں تو وہ وہاں
رہتے ہیں مجھ سے دور دور ۔۔۔۔۔۔ آٹھ پہر الگ الگ

ہوتے ہیں کیونکر اِک جگہ ۔۔۔۔۔۔ یہ عجب اتفاق ہے
جاتے ہیں جانبِ عدم ۔۔۔۔۔۔ یاں سے بشر الگ الگ

رنج فراق یار بھی ۔۔۔۔۔۔۔ صدمہِ روزگار بھی
ایک دل اور اتنے غم ۔۔۔۔۔۔ چاہیے گھر الگ الگ

غوث کا مرتبہ کیا تو نے قیتل تیغ کا
کٹ کے گرے ہیں دست و پا ۔۔۔۔۔۔ سینہ و سر الگ الگ

اُن کو یہ وہم ہے کہیں ۔۔۔۔۔ ایک سے ایک مل جائے
لوگ بہت ہیں بزم میں ۔۔۔۔۔۔ سب ہیں مگر الگ الگ

حشر کو اُس نے چُن لیے ۔۔۔۔۔۔۔ داغ گناہ گارِ عشق
تاڑ گئی ہزار میں ۔۔۔۔۔۔ اُس کی نظر الگ الگ

۔۔۔۔۔۔۔۔۔۔۔۔۔۔۔۔۔۔
داغ دہلوی





مرے کوچے میں وہ کن شوخیوں سے جابجا ٹھہرے 
بڑھے بڑھ کر تھمے دم بھر چلے چل کر ذرا ٹھہرے

تغافل کی نہ ٹھہرے آج قاتل فیصلہ ٹھہرے 
نہیں تلوار توفقرہ کوئی چلتا ہوا ٹھہرے

تسلی دل کو جو دیتے ہیں کیسے لوگ ہیں یارب 
جگر ہی جب نہ ٹھہرے تو جگر پرہاتھ کیاٹھہرے

مسیح وخضر گو یکتا ہیں دونوں ہم تو جب جانیں 
جو دل گرتا ہوا سنبھلے جو دم جاتا ہوا ٹھہرے 

اُڑاجاتا ہے مطلب کیا لکھوں میں خط میں اے قاصد 
پریشانی ٹھہرنے دے تو دل میں مدعا ٹھہرے

بہار بے خزاں دیکھی ہے کب تونے دکھا دیں ہم 
جو اُس کی طبع میں اے باغباں رنگ وفا ٹھہرے

گلہ جور وستم کا حشر میں پھر عشق کا دعویٰ
مراذمہ ترے آگے جو کوئی بے خطا ٹھہرے 

مری افتادگی نے آسمان پرمجھ کو پہُچایا 
زمین پر وہ نہ ٹھہرے جو تمہاری خاک پا ٹھہرے

وہی انسان پورا ہے اُس کے ہم تو قائل ہیں 
بھلوں میں جو بھلا ٹھہرے بروں میں جو براٹھہرے

مزا چکھا نہیں دنیا کازاہدتونے دنیا میں 
کبھی توبادہ نوشی کی بھی اے مرد خدا ٹھہرے

صبا تجھ کو توغنچے چٹکیوں ہی میں اُڑا دیتے 
جو نکہت خود ہو آوارا تو ٹھہرا ئے سے کیا ٹھہرے

ابھی سامان آہ و نالہ وفریاد پیچھے ہے 
قدم آگے نہ رکھے عرش اعلیٰ پر دعا ٹھہرے

تری آنکھیں ہین اس نےتاک لیں اپنے ٹھہرنے کو 
ٹھہرتی ہے اگر تو چشم دشمن میں حیا ٹھہرے

متاع شوق بھی ہے مایہ الفت بھی رکھتے ہیں 
اگر لیجیے تو کچھ سودا ہمارا آپ کا ٹھہرے

شب وعدہ جب اُن سے شکوہ تاخیر کرتاہوں 
تو کہتے ہیں کہ ہم انسان کیاٹھہرے ہوا ٹھہرے

رہا روز جزا کے بعد کاغم مجھ کو حشر میں 
کہ دن کو تو یہ ٹھہرے رات کو کیاجانے کیاٹھہرے

قسم ہے اُس کی یہ مرضی نہیں اے داور محشر 
کہ مجرم داغ ٹھہرے اور دشمن بے خطا ٹھہرے






کونسا طائرِ گم گشتہ اسے یاد آیا
دیکھتا بھالتا ہر شاخ کو صیّاد آیا

میرے قابو میں نہ پہروں دلِ ناشاد آیا
وہ مرا بھولنے والا جو مجھے یاد آیا

کوئی بھولا ہوا اندازِ ستم یاد آیا
کہ تبسّم تجھے ظالم دمِ بیداد آیا

لائے ہیں لوگ جنازے کی طرح محشر میں
کس مصیبت سے ترا کشتۂ بیداد آیا

جذبِ وحشت ترے قربان ترا کیا کہنا
کھنچ کے رگ رگ میں مرے نشترِ فصّاد آیا

اس کے جلوے کو غرض کون و مکاں سے کیا تھے
داد لینے کے لئے حسنِ خدا داد آیا

بستیوں سے یہی آواز چلی آتی ہے
جو کیا تو نے وہ آگے ترے فرہاد آیا

دلِ ویراں سے رقیبوں نے مرادیں پائیں
کام کس کس کے مرا خرمنِ برباد آیا

عشق کے آتے ہی منہ پر مرے پھولی ہے بسنت
ہو گیا زرد یہ شاگرد جب استاد آیا

ہو گیا فرض مجھے شوق کا دفتر لکھنا
جب مرے ہاتھ کوئی خامۂ فولاد آیا

عید ہے قتل مرا اہلِ تماشا کے لئے
سب گلے ملنے لگے جبکہ وہ جلّاد آیا

چین کرتے ہیں وہاں رنج اٹھانے والے
کام عقبیٰ میں ہمارا دلِ ناشاد آیا

دی شبِ وصل موذّن نے اذاں پچھلی رات
ہائے کمبخت کو کس وقت خدا یاد آیا

میرے نالے نے سنائی ہے کھری کس کس کو
منہ فرشتوں پہ یہ گستاخ یہ آزاد آیا

غمِ جاوید نے دی مجھ کو مبارکبادی
جب سنا یہ انہیں شیوۂ بیداد آیا

میں تمنائے شہادت کا مزا بھول گیا
آج اس شوق سے ارمان سے جلّاد آیا

شادیانہ جو دیا نالہ و شیون نے دیا
جب ملاقات کو ناشاد کی ناشاد آیا

لیجیے سنیے اب افسانۂ فرقت مجھ سے
آپ نے یاد دلایا تو مجھے یاد آیا

آپ کی بزم میں سب کچھ ہے مگر داغ نہیں
ہم کو وہ خانہ خراب آج بہت یاد آیا














 


تو قیامت کی چال کرتا ہے 
بے چلے پائمال کرتا ہے

تجھ سے جو عرض حال کرتا ہے 
سچ تو یہ ہے کمال کرتاہے

اُس کے انداز دیکھئے کیاہوں 
ناز جس کاخیال کرتاہے

دل کو اس عاجزی سے دیتاہوں 
کوئی جانے سوال کرتاہے

تیغ کرتی ہے خون اے قاتل 
مفت تو ہاتھ لال کرتاہے

نہیں گھٹتا یہ داغ دل یارب 
بدر کو تو ہلال کرتاہے

یہ ستم کب نصیب ہوتے ہیں 
مجھ کو ظالم نہال کرتاہے

دردلدار تک نہیں جاتا 
نامہ برانتقال کرتاہے

داغ سے اور مدعی اُلجھے 
وہ تمہارا خیال کرتاہے




  
کونسا طائرِ گم گشتہ اسے یاد آیا
دیکھتا بھالتا ہر شاخ کو صیّاد آیا

میرے قابو میں نہ پہروں دلِ ناشاد آیا
وہ مرا بھولنے والا جو مجھے یاد آیا

کوئی بھولا ہوا اندازِ ستم یاد آیا
کہ تبسّم تجھے ظالم دمِ بیداد آیا

لائے ہیں لوگ جنازے کی طرح محشر میں
کس مصیبت سے ترا کشتۂ بیداد آیا

جذبِ وحشت ترے قربان ترا کیا کہنا
کھنچ کے رگ رگ میں مرے نشترِ فصّاد آیا

اس کے جلوے کو غرض کون و مکاں سے کیا تھے
داد لینے کے لئے حسنِ خدا داد آیا

بستیوں سے یہی آواز چلی آتی ہے
جو کیا تو نے وہ آگے ترے فرہاد آیا

دلِ ویراں سے رقیبوں نے مرادیں پائیں
کام کس کس کے مرا خرمنِ برباد آیا

عشق کے آتے ہی منہ پر مرے پھولی ہے بسنت
ہو گیا زرد یہ شاگرد جب استاد آیا

ہو گیا فرض مجھے شوق کا دفتر لکھنا
جب مرے ہاتھ کوئی خامۂ فولاد آیا

عید ہے قتل مرا اہلِ تماشا کے لئے
سب گلے ملنے لگے جبکہ وہ جلّاد آیا

چین کرتے ہیں وہاں رنج اٹھانے والے
کام عقبیٰ میں ہمارا دلِ ناشاد آیا

دی شبِ وصل موذّن نے اذاں پچھلی رات
ہائے کمبخت کو کس وقت خدا یاد آیا

میرے نالے نے سنائی ہے کھری کس کس کو
منہ فرشتوں پہ یہ گستاخ یہ آزاد آیا

غمِ جاوید نے دی مجھ کو مبارکبادی
جب سنا یہ انہیں شیوۂ بیداد آیا

میں تمنائے شہادت کا مزا بھول گیا
آج اس شوق سے ارمان سے جلّاد آیا

شادیانہ جو دیا نالہ و شیون نے دیا
جب ملاقات کو ناشاد کی ناشاد آیا

لیجیے سنیے اب افسانۂ فرقت مجھ سے
آپ نے یاد دلایا تو مجھے یاد آیا

آپ کی بزم میں سب کچھ ہے مگر داغ نہیں
ہم کو وہ خانہ خراب آج بہت یاد آیا